Москва щызэIукIагъэх Москва щызэIукIагъэх
Урысые Федерацием цIыфхэм якъэухъумэнкIэ ошIэ-дэмышIэ IофхэмкIэ, стихийнэ тхьамыкIагъохэм къыздахьыгъэхэм ядэгъэзыжьынкIэ иминистрэу Евгений Зиничевымрэ Адыгеим и ЛIышъхьэу КъумпIыл Муратрэ машIом республикэм зыкъыщимыштэнымкIэ Iофтхьабзэу зэрахьэхэрэм нахьыбэу шIуагъэ къягъэтыгъэным епхыгъэ Iофыгъохэм атегущыIагъэх.
Краснодар имэшIогъэкIосэ къулыкъухэр нэбгырэ мин 34-м ехъу зыдэс поселкэу Яблоновскэм машIо къызыщыхъукIэ, игъом нэмысышъухэу къыхэкIы. Джащ фэдэу къушъхьэтхэу Лэгъо-Накъэрэ поселкэу Гъозэрыплъэрэ апэблэгъэ къушъхьэ-турист кластерри икъоу ухъумагъэп. Сыда пIомэ поселкэу Каменномостскэм дэт мэшIогъэкIосэ депом ар километрэ 45-кIэ пэIудзыгъ.
Адыгэ Республикэм и ЛIышъхьэу КъумпIыл Мурат федеральнэ программэм тетэу Тэхъутэмыкъое районымкIэ поселкэу Яблоновскэмрэ Мыекъопэ районымкIэ поселкэу ХъымыщкIэйрэ мэшIогъэкIосэ частитIу ащыгъэпсыгъэным епхыгъэ IофыгъомкIэ Урысыем и МЧС ипащэ зыфигъэзагъ. Поселкэу Яблоновскэмрэ сатыушIыпIэ комплексхэмрэ машIом щыухъумэгъэнхэм мэхьанэшхо зэриIэр зэIукIэгъум къыщыхагъэщыгъ. Джащ фэдэу Адыгеим икъушъхьэ-турист кластер машIом зыкъыщимыштэнымкIэ ищыкIэгъэ Iофтхьабзэхэр зехьэгъэнхэ зэрэфаер хагъэунэфыкIыгъ.
ЦIыфхэм якъэухъумэнкIэ ошIэ-дэмышIэ IофхэмкIэ специалистхэм ягъэхьазырын, мэшIогъэкIосэ къулыкъухэр мылъкукIи, техникэкIи нахь зэтегъэпсыхьэгъэнхэм япхыгъэ Iофыгъо заулэмэ ахэплъагъэх.
ЗэIукIэгъум икIэуххэм атетэу министрэу Евгений Зиничевым подразделениехэм япащэхэм пшъэрылъ гъэнэфагъэхэр афишIыгъэх.
Адыгеим и ЛIышъхьэу КъумпIыл Муратрэ Урысые Федерацием наукэмрэ апшъэрэ гъэсэныгъэмрэкIэ иминистрэу Михаил Котюковымрэ Москва зэIукIэгъу щызэдыряIагъ.
Гъэсэныгъэ языгъэгъотырэ, научнэ учреждениехэм хэхъоныгъэ ашIынымкIэ республикэм ихэбзэ къулыкъухэмрэ федеральнэ ведомствэмрэ зэрэзэдэлэжьэщтхэм мыщ щытегущыIагъэх.
Урысые Федерацием и Федеральнэ ЗэIукIэ ФедерациемкIэ и Совет хэтэу Хъопсэрыкъо Мурат зэIукIэгъум хэлэжьагъ.
Апшъэрэ еджэпIитIу — Адыгэ къэралыгъо университетыр, Мыекъопэ къэралыгъо технологическэ университетыр, АПК-м ылъэныкъокIэ федеральнэ научнэ-ушэтэкIо, бюджет организации 6 Адыгеим зэрэщызэхэщагъэр зэIукIэгъум щыхагъэунэфыкIыгъ. Экономикэм, мэкъу-мэщым, гъэсэныгъэм алъэныкъокIэ ыкIи нэмыкI отраслэхэм Iоф ащызышIэщтхэм, ушэтын Iофхэм апылъыщтхэм ягъэхьазырынкIэ мыщ фэдэ учреждениехэм мэхьанэшхо зэряIэр Адыгеим и ЛIышъхьэ къыхигъэщыгъ. Ахэм яопыт хэгъэгумкIи, республикэмкIи научнэ-практическэ мэхьанэшхо иI.
Гъэсэныгъэ языгъэгъотырэ федеральнэ, научнэ-ушэтэкIо организациехэр мылъкукIи, техникэкIи нахь зызэтырагъэпсыхьэхэкIэ, мылъкур нахьыбэу къызафатIупщыкIэ, ахэм Iофэу ашIэрэм шIуагъэ нахьыбэу къытыщт.
ЗэIукIэгъум республикэр кIэщакIо зыфэхъугъэ Iофыгъохэм щахэплъагъэх, ахэмкIэ ищыкIэгъэ унашъохэр аштэщтых.
АР-м и ЛIышъхьэ ипресс-къулыкъу
Источник: Газета Адыгэ Макъ