Шапхъэхэм шъуадэмых Шапхъэхэм шъуадэмых

Пхъэ машIокIэ зиунэ зыгъэплъыхэрэр ары непэ анахьэу тыкъызщыуцумэ тшIоигъор. Пстэуми апэу ахэм зыщагъэ­гъупшэ мыхъущтыр хьакухэм фабэр къызэратырэм имызакъоу, машIом зы­къыштэным ищынагъо зэрашъхьарытыр ары.
Ар анахьэу етIани щынагъо зыхъурэр Iугъор зэрыкIыхэрэ дэпкъхэр, трубэхэр игъом замыгъэкъабзэхэкIэ ары. Хьаку Iупэм иджэхашъо тенэч теIулIэгъэнэу щыт. ЯтIонэрэ хэукъоныгъэу ашIыхэрэм ащыщ бензин, керосин е нэмыкI къэорэ гъэстыныпхъэхэр хьакум зэрэпакIэхэрэр. Хьакум илъ машIом пхъэу паплъхьэрэм икIыхьагъэ ежь хьакум фытегъэпсыхьэгъэн фае. Хьакушъхьэр бгъэплъыщэнэу щытэп, температурэ гъэнэфагъэ ыIыгъы­нэу ищыкIагъ. Iоф зымышIэу чъыIэм щытыгъэ гъэфэбапIэри игъорыгъозэ бгъэплъын фае.

ЗипсэупIэ хьакукIэ ежь-ежьырэу зыгъэплъыхэрэм ягугъу къэтшIы зыхъукIэ, къыхэтымыгъэщын тлъэкIырэп щынэгъо ин къэзытыхэрэм угарнэ газыр зэращыщыр. Ар токсичнэу щыт, шъо иIэп, цIыфым къышIэрэп. Iугъор зэрыкIырэ гъуа­нэм илъ гъучIыр зырагъачъэкIэ, унэм угарнэ газыр еуцо.

ПсэупIэм машIом зыкъыщиштэнэу зыкIэхъурэмэ зэу ащыщ электроприборхэр агъэфедэхэ зыхъукIэ, щынэгъончъагъэм ишапхъэхэр зэраукъохэрэр. Унэхэр зэрагъэплъыхэрэ пкъыгъохэм япчъагъэ мафэ къэс хэхъо. Ау ахэр тэрэзэу агъэфедэхэрэп.

Пхъэ машIокIэ зиунэ зыгъэплъыхэрэм ашIэ мыхъущтхэр:

— машIо зэрышIыхьэгъэ хьакум лъыплъэн щымыIэу е зыныбжь имыкъугъэр Iусэу къэбгъэнэныр;

— хьаку Iупэм машIор къызыкIэнэщт пкъыгъохэр Iуплъхьанхэр;

— машIор зэхэбгъэнэнымкIэ къэорэ гъэстыныпхъэхэр бгъэфедэнхэр;

— шIомыкIым, газым афытемыгъэ­псыхьэгъэ хьакур хэбгъэнэныр;

— Iугъор зэрыкIырэ трубэхэм имыщыкIэгъэ пкъыгъохэр арыбгъэуцонхэр;

— хьакур бгъэплъыщэныр.

Урысые Федерацием ихэбзэгъэуцугъэ къызэрэдилъытэрэм тетэу нэбгырэ пэпчъ ипшъэрылъ шъхьаIэхэм ащыщ щынэ­гъончъагъэмкIэ шапхъэу щыIэхэм адэмыхыныр.

Кушъу Рустам.

Урысыем ошIэ-дэмышIэ IофхэмкIэ и Министерствэ и ГъэIорышIапIэу Адыгеим щыIэм иIофышI, хэгъэгу кIоцI къулыкъумкIэ капитан.