Бюджетым къыхигъэхъощт Бюджетым къыхигъэхъощт
Илъэсыбэ хъугъэу товарэу къэтщэфырэм ахъщэ тедзэу иIэр (НДС-р) уасэм ипроцент 18 зэрэхъущтыгъэр, джы ар процент 20-м нагъэсыгъ.
Урысые Федерацием финансхэмкIэ и Министерствэ къызэриIорэмкIэ, хьакъулахьыкIэу цIыфхэм атыщтым федэу къэралыгъом къыфихьыщтыр къалъытэгъах. Илъэсым къыкIоцI къэралыгъо бюджетым сомэ миллиард 620-рэ фэдиз къыхэхъощт, ар социальнэ инфраструктурэм игъэпсын пэIуагъэхьащт. Гъэсэныгъэм зыкъегъэIэтыгъэнымкIэ, цIыфхэм япсауныгъэ къэухъумэгъэнымкIэ, культурэм зегъэушъомбгъугъэнымкIэ IэпыIэгъушIу хъущт.
НДС-р процент 20 хъоу зыфамышIыщт товархэри щыIэх. Ахэм ащыщых сабыйхэм арагъэшхырэ диетическэ гъомылапхъэхэр, щыгъынхэр, Iэзэгъу уцхэр, къыхаутырэ тхылъхэр ыкIи нэмыкI IофшIагъэхэр. Проценти 10-м зэрэтетэу къагъэнагъэх лыр ыкIи ащ хэшIыкIыгъэ шхынхэр, щэр ыкIи ащ хашIыкIыхэрэр, кIэнкIэр, семчык дагъэр, шъоущыгъур, щыгъур, хьаджыгъэр, пцэжъыер, нэмыкI шхыныгъохэри. Ау специалистхэм къызэраIорэмкIэ, НДС-р къамыIэтыгъагъэми уасэхэр къаIэтыщтгъагъэ, сыда пIомэ гъэстыныпхъэм ыуасэ къыхэхъо зэпыт.
(Тикорр.).
Источник: Газета Адыгэ Макъ