Яблоновскэм къыщызэIуахыгъ Яблоновскэм къыщызэIуахыгъ
Къэралыгъо ыкIи муниципальнэ фэIо-фашIэхэр зыгъэцэкIэхэрэ Гупчэм къыдыхэлъытэгъэ бизнес-чIыпIэ мы мафэхэм мэфэкI шIыкIэм тетэу поселкэу Яблоновскэм къыщызэIуахыгъ.
— Предпринимательхэм яIофшIэн зэхащэнымкIэ, ящыкIэгъэ пстэури агъотынымкIэ амалышIухэр аIэкIэлъ хъугъэх, чэзыуми хэтыжьыщтхэп, — къыщаIуагъ Адыгеим IофшIэнымкIэ ыкIи социальнэ хэхъоныгъэмкIэ и Министерствэ.
АР-м экономикэ хэхъоныгъэмкIэ ыкIи сатыумкIэ и МинистерствэкъызэрэщыхагъэщыгъэмкIэ, МФЦ-м епхыгъэ подразделениеу агъэпсыгъэр бизнес цIыкIумрэ гурытымрэ IэпыIэгъу афэхъугъэным иинфраструктурэ изы Iахь хъущт. Предпринимательствэм хэщагъэхэм яшIуагъэ арагъэкIынымкIэ къэралыгъо хэбзэ ыкIи чIыпIэ зыгъэIорышIэжьын къулыкъухэм зэхащэрэ Iофтхьабзэхэм шIуагъэу къатырэм хэгъэхъогъэным ар фэIорышIэщт.
МэфэкI шIыкIэм тетэу псэуалъэр къызызэIуахым ыуж зэхащэгъэ Iэнэ хъураем предпринимательхэр къырагъэблэгъагъэх, хабзэмрэ бизнесымрэ язэдэлэжьэн хэхъоныгъэхэр ышIынхэм епхыгъэ Iофыгъохэм атегущыIагъэх.
Шъхьэихыгъэ зэдэгущыIэгъум къыдыхэлъытагъэу предпринимательхэм гухэлъэу яIэхэр щыIэныгъэм щыпхыращынхэ алъэкIынымкIэ лъэныкъохэм яеплъыкIэхэр къыраIотыкIыгъэх. Мыщ дэжьым лъэпкъ, федеральнэ ыкIи шъолъыр проектхэм яшIуагъэу къэкIощтыр къаIотагъ.
Джащ фэдэу предприятиехэм Iоф ащызышIэщт кадрэхэм ягъэхьазырын, чIыпIэ продукцием илъыгъэкIотэн, предпринимательхэм пэрыохъухэр ямыIэнхэм, нэмыкI Iофыгъохэм Iэнэ хъураем хэлэжьагъэхэр атегущыIагъэх, тапэкIэ анахьэу анаIэ зытырагъэтын фэе лъэныкъохэр агъэнэфагъэх.
(Тикорр.).
Источник: Газета Адыгэ Макъ