НыбжьыкIэ парламентым хэхьащтхэм якъыхэхын рагъэжьагъ НыбжьыкIэ парламентым хэхьащтхэм якъыхэхын рагъэжьагъ
Адыгэ Республикэм и Къэралыгъо Совет – Хасэм иунашъоу «Адыгэ Республикэм и Къэралыгъо Совет – Хасэм дэжь щызэхэщэгъэ НыбжьыкIэ парламентым хэтыщтхэм якъыхэхын ехьылIагъ» зыфиIорэр депутатхэм мэзаем яIэгъэ зэхэсыгъом щаштагъ.
НыбжьыкIэ парламентым ехьылIэгъэ Положением тегъэпсыхьагъэу илъэситIу пIалъэкIэ ар хадзы. НыбжьыкIэ парламентым хэтыщтхэм яполномочиехэр зырагъажьэхэрэр апэрэ зэхэсыгъор зыщыIэгъэ мафэм къыщыублагъэу ары ыкIи парламентым кIэу хэхьащтхэр зыщаухэсхэрэ мафэм яполномочиехэр аухых.
Адыгэ Республикэм и Къэралыгъо Совет – Хасэм къызэрэщатыгъэмкIэ, НыбжьыкIэ парламентэу Iоф зышIэрэм иапэрэ зэхэсыгъо 2017-рэ илъэсым гъэтхапэм и 31-м щыIагъ. НыбжьыкIэ парламентым хэхьэх Урысые Федерацием игражданхэу илъэс 18-м къыщегъэжьагъэу 35-м нэс зыныбжьхэр, пстэумкIи нэбгырэ 35-м шIомыкIэу. Ахэм ахэхьэх Адыгэ Республикэм и Къэралыгъо Совет – Хасэм къепхыгъэ политическэ партиехэм ахэтхэр, шъолъыр къутамэхэм, ныбжьыкIэ организациехэм ыкIи движениехэм ахэтхэр, апшъэрэ еджапIэхэм ястудентхэр. Кандидатурэхэм афэгъэхьыгъэ унашъохэр Адыгэ Республикэм и Къэралыгъо Совет — Хасэм, къэбар жъугъэм иамалхэм унашъор къызыхаутырэм ыуж мэзитIу пIалъэм къыкIоцI, къыIэкIэжъугъэхьанхэ шъулъэкIыщт.
Источник: Газета Адыгэ Макъ
