Хабзэр амыукъоным лъэплъэх Хабзэр амыукъоным лъэплъэх
IофшIапIэм Iумытхагъэу лажьэхэрэм япчъагъэ нахь макIэ шIыгъэным фэгъэзэгъэ межведомственнэ комиссием изэхэсыгъо джырэблагъэ щыIагъ.
Г. Цыганковам къызэриIуагъэмкIэ, 2018-рэ илъэсым аныбжьыкIэ Iоф зышIэн зылъэкIыщтхэу, ау мылажьэхэрэм япчъагъэ нэбгырэ 6069-рэ хъоу республикэм щатхыгъ.
IофшIэн зэфыщытыкIэхэр анахьыбэу зыщамытхырэ лъэныкъохэр: сатыушIыныр (нэбгырэ 1628-рэ), мэкъу- мэщыр (нэбгырэ 545-рэ), гъомылэпхъэ къыдэгъэкIыныр (нэбгырэ 664-рэ), псэолъэшIыныр (нэбгырэ 307-рэ). ГумэкIыгъохэр дэгъэзыжьыгъэнхэм фэшI предприятиехэм япащэхэр къырагъэблагъэхэзэ зэхэсыгъуи 111-рэ, дэкIыгъо 436-рэ зэхащагъ. Ахэм ащыщэу 78-р муниципальнэ образованиехэм ежь-ежьырэу ащарагъэкIокIыгъ, 358-р — уплъэкIун-лъыплъэн къулыкъухэр ягъусэхэу.
Мы гумэкIыгъор дэгъэзыжьыгъэным фэIорышIэрэ межведомственнэ IофшIэкIо купхэр муниципальнэ образованиехэм зэкIэми ащызэхащагъэх. Муниципалитет пэпчъ ежь екIолIэкIэ гъэнэфагъэхэр къыгъотызэ пшъэрылъхэр зэшIуехых. IофшIэнымкIэ хэбзэгъэуцугъэм ишапхъэхэр зыукъохэрэм административнэ пшъэдэкIыжь зэрарагъэхьыщтымкIэ IофшIапIэ языгъэгъотырэ пэщэ 2203-мэ макъэ арагъэIугъ. IофшIэн хэбзэгъэуцугъэр аукъуагъэу тхылъ 36-рэ АР-м IофшIэнымкIэ и Къэралыгъо инспекцие фагъэхьыгъ. 2018-рэ илъэсым зэкIэмкIи нэбгырэ 6516-мэ IофшIэн зэзэгъыныгъэхэр адашIыгъэх.
2018-рэ илъэсым иаужырэ мэзищ нэбгырэ 4392-мэ якъэбархэр уплъэкIугъэнхэм фэшI ПенсиехэмкIэ фондым и Къутамэу республикэм щыIэм IэкIагъэхьагъэх. Ахэм ащыщэу нэбгырэ 3884-р IофшIапIэхэм аIутхагъэхэу Iоф ашIэ, нэбгырэ 2306-м страховой тынхэр атых. БлэкIыгъэ илъэсым имэзищ плIанэ изэфэхьысыжьхэмкIэ, IофшIапIэм Iутхагъэу лажьэхэрэм пенсие хэгъэкIынэу афашIыгъэр сомэ миллион 21-м ехъугъ.
Нэужым IофшIэн зэфыщытыкIэхэр шапхъэхэм адиштэнхэм ыкIи IофшIэнымкIэ хэбзэгъэуцугъэр республикэм щыгъэцэкIагъэ зэрэхъурэм фэгъэхьыгъэ уплъэкIунхэу 2018-рэ илъэсым зэхащагъэхэм къатегущыIагъ Сихъу Русетэ.
Iофтхьабзэм хэлэжьагъэхэм къызэраIуагъэмкIэ, гумэкIыгъоу къэуцухэрэр икъоу зэшIохыгъэ зыхъухэкIэ, хэбзэIахьэу ыкIи страховой тынэу къаугъоихэрэм ахэхъощт, республикэ бюджетым къихьэрэ ахъщэри нахьыбэщт. Ащ ишIуагъэкIэ экономикэмкIэ ыкIи социальнэ лъэныкъомкIэ пшъэрылъэу щытхэр зэрифэшъуашэу зэшIохыгъэхэ хъущт.
КIАРЭ Фатим.
Сурэтыр Iэшъынэ Аслъан тырихыгъ.
Источник: Газета Адыгэ Макъ