ЗэхъокIыныгъэшIухэм республикэр афэкIо ЗэхъокIыныгъэшIухэм республикэр афэкIо
Урысые Федерацием и Президентэу Владимир Путиным УФ-м и Федеральнэ ЗэIукIэ илъэс къэс фигъэхьырэ Джэпсалъэм псауныгъэр къэухъумэгъэным епхыгъэ Iофыгъохэм ягугъу къыщишIыгъ.
Адыгэ Республикэм и ЛIышъхьэ ипресс-къулыкъу къызэритырэмкIэ, «КIэугъоекIо правительств» зыфиIорэ проектыр республикэм щыгъэцэкIагъэ хъуным мэхьанэшхо раты. КъумпIыл Мурат къызэрэхигъэщыгъэмкIэ, проектыр апэу зыщагъэцэкIэнэу зыщырагъэжьэгъэхэ шъолъырхэм Адыгеир ащыщ. Ащ пшъэрылъ шъхьаIэу иIэр къэралыгъо гъэцэкIэкIо хэбзэ къулыкъухэм яIофшIэн шIуагъэ къытэу зэхащэныр, ащ пэIухьэрэ уахътэр нахь макIэ шIыгъэныр арых.
«КIэугъоекIо поликлиник» зыфиIорэ пректым зыкъыфэдгъазэмэ, къэралыгъомкIэ ар апэу зыгъэцэкIэнэу езыгъэжьагъэхэм ащыщ Адыгэ Республикэм псауныгъэр къэухъумэгъэнымкIэ и Министерствэ. ЗэхъокIыныгъэхэм зэфэхьысыжьышIухэр къакIэлъыкIуагъэх. Регистратурэм, врач-специалистхэм зафагъэзэным пае чэзыум зэрэхэтхэр нахь макIэ хъугъэ. Диспансеризацием икIуни цIыфхэм псынкIэ къащыхъугъ. ФэIо-фашIэхэр зэрагъэцакIэхэрэми нахь ыгъэразэхэ хъугъэ.
2018-рэ илъэсым республикэм гупчэ лабораторие щашIыгъ. Ащ ишIуагъэкIэ врачыр уплъэкIунхэм язэфэхьысыжьхэм зэряжэрэ уахътэр нахь макIэ хъугъэ. Джы ахэр зэикI медицинэ къэбарлъыгъэIэс системэм иплъэгъонхэ плъэкIыщт.
Джащ фэдэу блэкIыгъэ илъэсым къыщегъэжьагъэу «Новая модель медицинской организации» зыфиIорэ проектыр Адыгеим щагъэцакIэ. Ащ къызэрэщыдэлъытагъэу, къалэм дэт медицинэ учреждениехэр зэрапхыгъэх. Мыщ фэдэ шIыкIэр тапэкIэ псауныгъэр къэухъумэгъэным иобъектхэу республикэм ит пстэуми ащагъэфедэ хъущт.
«КIэугъоекIо поликлиник» зыфиIорэ проектыр Адыгеим щагъэцакIэ зыщыхъугъэм къыщегъэжьагъэу ащ шIуагъэу хэлъыр республикэм щыпсэухэрэм зэхашIэн алъэкIыгъ.
Урсэкъо Саидэ медицинэ учреждениехэм бэрэ яуалIэрэп. Ащ зэрилъытырэмкIэ, чэзыур ины зыхъукIэ, специалистым екIолIэгъуае мэхъу. Зыгорэм ыгъэгумэкIы зыхъукIэ унэе медицинэ учреждением макIо.
— ПроектыкIэр республикэм зэрэщагъэцакIэрэр ИнтернетымкIэ слъэгъугъэ. Ащ шIуагъэу къытыщтхэми сяджагъ. Тхьамэфэ заулэ тешIагъэу сипсауныгъэ изытет сигъэгумэкIэу медицинэ учреждением сыкIон фаеу хъугъэ, — къытфеIуатэ Саидэ. – Сызщыпсэурэ унэм пэблагъэу къыщашIыгъэ поликлиникэм зыфэзгъэзагъ. ЫпэкIэ чэзыоу регистратурэм щыслъэгъущтыгъэр нахь макIэ зэрэхъугъэм гу лъыстагъ. Охътабэ темышIэу врачым сиштагъ. ЗэхъокIыныгъэу проектыкIэм къыздихьыгъэхэр нэрылъэгъу къысфэхъугъэх.
Диспансеризациер зыкIун гухэлъ зиIэу поликлиникэм еолIэгъэ Хъот Сими гущыIэгъу тыфэхъугъ. Ащ тызэрэщигъэгъозагъэмкIэ, мэфэ заулэкIэ уплъэкIунхэр къыфашIыгъэх ыкIи ипсауныгъэ изытет зыфэдэр зэригъэшIагъ.
— Проектыр республикэм щагъэцэкIэнэу рагъэжьэгъэ къодый, ащ джыри зэхъокIыныгъэхэр фэхъущтых, — еIо Симэ. – Ау чэзыур нахь макIэ зэрэхъугъэр непэ тинэрылъэгъу. Мыщ фэдэ шIыкIэм шIуагъэ къызэритыщтыри нафэ.
Гъонэжьыкъо Сэтэнай.
Источник: Газета Адыгэ Макъ