Сыд хъума ара зыхаубытыкIырэр? Сыд хъума ара зыхаубытыкIырэр?
Пенсием зэрахаубытыкIыгъэм ыпкъ къикIэу ПенсиехэмкIэ фондым зыкъыфэзгъазэрэр нахьыбэ хъугъэ. Ащ фэшI шапхъэу хэбзэгъэуцугъэм къыщыдэлъытагъэхэм ягугъу къэтшIы тшIоигъуагъ.
Хьыкумхэр Iофым хаплъэхи, рахъухьагъэр къэзыушыхьатырэ тхылъэу (исполнительный документ) хьыкум приставхэм аIэкIэхьагъэм е УФ-м ПенсиехэмкIэ ифонд икъулыкъухэм ушъхьагъу гъэнэфагъэ яIэу рахъухьагъэм къапкъырыкIыхэзэ пенсием хаубытыкIы.
Приставхэм тхылъэу къаратыгъэр яIэубытыпIэу исабый кIэлэпIупкIэр игъом фэзымыгъэхьыгъэхэр, банкым чIыфэу къыIихыгъэр, псэупIэ-коммунальнэ фэIо-фашIэхэм апкIэ, административнэ тазырэу къытыралъхьагъэр, хэбзэIахьхэр ыкIи къаугъоихэрэр игъом зымытыгъэхэр ары зипенсие хаубытыкIырэр. Джащ фэдэу юридическэ е физическэ лицом имылъку чIезыгъэнагъэм, цIыфым ипсауныгъэ зэрар езыхыгъэм, бзэджэшIагъэу зэрихьагъэм ыпкъ къикIэу чIэнагъэ зышIыгъэм фипщынынэу къытыралъхьагъэм паий пенсием хаубытыкIыщт.
Процентэу аубытыщтыр, законым къызэрэщыдэлъытагъэм диштэу, ежь гъэцэкIэкIо приставыр ары зыгъэнафэрэр. ЫпэрапшIэу хиубытыкIыщтыр зыфэдизым ыкIи ежь-ежьырэу чIыфэр ыпщынынэу пIалъэу иIэм пенсионерыр щигъэгъозэн фае. А уахътэм чIыфэр къытыжьынэу амал ащ имыIэмэ, ипенсие процент гъэнэфагъэ зэрэхаубытыкIыщтыр зэрыт тхылъыр ПенсиехэмкIэ фондым ичIыпIэ органэу зэпхыгъэм фагъэхьы.
Законым къызэригъэнафэрэмкIэ, процент 50 нахьыбэ хаубытыкIын фитхэп, ау… КIэлэпIупкIэр игъом зымытыгъэхэм, цIыфым ипсауныгъэ зэрар езыхыгъэхэм, цIыфыр зыIыгъыр зэрэIэкIэкIодагъэм ыпкъ къикIыкIэ чIэнагъэу ригъэшIыгъэм е нэмыкI бзэджэшIагъэ зезыхьагъэу зэрар зыхьыгъэм пае мылъку ытын фаеу къызтыралъхьагъэхэм япенсиехэм процент 70-м нэсэу, ау шIомыкIэу афыхаубытыкIын фитых.
Пенсионерым ежь илажьэкIэ пенсиеу е социальнэ ахъщэ тынэу къытефэрэм нахьыбэ къыратыгъэмэ, лыеу къыфэкIуагъэр нэужым ипенсие хаубытыкIыжьынэу УФ-м ПенсиехэмкIэ ифонд иорганхэм рахъухьэ. ГущыIэм пае, студентэу зыIыгъын зимыIэжьым е янэ-ятэхэм аIыгъым пенсие къыратыным фэшI ар очнэ шIыкIэм тетэу еджэн фае. ЗыгорэкIэ еджапIэм къычIагъэкIыгъэмэ, заочнэ шIыкIэм техьажьыгъэмэ е дзэм къулыкъу щихьынэу ащагъэмэ, пенсиер къыфэкIожьыщтэп. Ау ащ ПенсиехэмкIэ фондыр щамыгъэгъуазэу бэрэ къыхэкIы. А уахътэм ахъщэ лыеу къыфэкIуагъэр нэужым аубытыжьын фитых.
Джащ фэдэу кIэлэцIыкIу сэкъатым, апэрэ купым хэхьэрэ сэкъатныгъэ зиIэм, нэжъ-Iужъым алъыплъэхэу, ащ пае ахъщэ тын къызэратыхэрэр IофшIапIэ Iутынхэ фимытхэу хэбзэгъэуцугъэм къыщеIо. Ащ пае къэмынэу IофшIапIэм Iухьагъэу, ау фондыр щигъэгъозэныр щыгъупшагъэу къызэрэхэкIырэри макIэп. Ар къычIэщымэ, лыеу ратыгъэр нэужым аубытыжьыщт.
Пенсионерыр зэрыпсэун ылъэкIыщт ахъщэ анахь макIэм кIимыгъахьэу пенсиер зыфагъэуцугъэхэм федеральнэ е региональнэ социальнэ ахъщэ тедзэ къараты. Ау ар IофшIапIэм Iумытхэр ары зыфагъэнафэхэрэр. Пенсионерыр IофшIапIэ Iухьагъэу, ащ игъом ПенсиехэмкIэ фондыр щимыгъэгъозагъэмэ, лыеу къыфэкIуагъэр Iахыжьын фитых.
Пенсионерэу иегъэджэн е IофшIэпIэ чIыпIэ Iугъэхьэгъэным япхыгъэ ахъщэ тын къызыфакIохэрэм зэкIэри, пенсиер, социальнэ ахъщэ тыныр е компенсациер зафагъэнафэкIэ, пшъэрылъэу яIэхэр, шапхъэхэр къызщиIохэрэ тхылъым кIагъатхэх. Ар аукъоу, ахъщэ лые ПенсиехэмкIэ фондым къызаритыкIэ, ащ ежьхэм ежь-ежьырэу рагъэгъэзэжьын фае. Ащ къемызэгъырэм иIоф хьыкумыр хэплъэщт. Хэбзэгъэуцугъэм къызэрэщыдэлъытагъэмкIэ, пенсиеу къыфакIорэм ипроцент 20-м нэсэу аубытын фитых.
УФ-м ПенсиехэмкIэ ифонд и Къутамэу АР-м щыIэм ипресс-къулыкъу.
Источник: Газета Адыгэ Макъ