Осым къытфещэх, лъэпкъым нэIуасэ фэхъух Осым къытфещэх, лъэпкъым нэIуасэ фэхъух
БлэкIыгъэ зыгъэпсэфыгъо мафэхэм къушъхьэхэм къащесыгъэ осым зекIо нахьыбэ Адыгеим зэрищэлIагъ. Кавказ къушъхьэхэм, мэзхэм кIымэфэ уахътэм ядэхагъэ зэзыгъэлъэгъу зышIоигъуагъэхэм ащ фэдэ амал яIагъ. Осыр зытырахыгъэ гъогу гъэкъэбзагъэхэмкIэ Партизанскэ гъэхъунэм нэсыгъэх.
Къушъхьэ сыджхэр ос закIэх, мэзым хэт чъыгхэм якъутамэхэр къехыгъэ осым къы-
рищэхыгъэхэ фэдэу къыпщэхъу. Зыфэдэ къэмыхъугъэ кIымэфэ пшысэм Адыгеим и Мыекъопэ район ухещэ. МашинэкIэ узэрыкIощт гъогухэм осыр атырахыгъэу къушъхьэм дэкIоегъошIу. Мэз пырыпыцум ухахьэ пшIоигъомэ, осрыкIо машинэхэм уарытIысхьэмэ нахь Iэрыфэгъу. ГъэпсэфыпIэ чIыпIэхэм зекIохэм ащ фэдэ амалхэр къащараты.
Хьаджыкъо (Каменномостскэм) дэт зекIо зыгъэпсэфыпIэм ипащэу Тхьайшъэо Рустам къызэриIорэмкIэ, ом изытет емылъытыгъэу гъэпсэфакIохэр къафэкIох. Тпэгъунэгъу шъолъырхэм ямызакъоу, Москва, Санкт-Петербург, Татарстан хьакIэхэр къарэкIых. Адыгеим зызщыбгъэпсэфыщт чIыпIэ гъэшIэгъоныбэ иI. КIымэфэ зекIо гъогухэри зэфэшъхьафых. ОсрыкIо машинэкIэ къушъхьэ лъэгапIэм узнэсыкIэ, сурэт хьалэмэтыр нэм къыкIэуцо. Адыгэ чIыгум идэхагъэ къиIотыкIыгъуай. Ар плъэгъун, зэхэпшIэн фае! Адыгэм итарихъ, икультурэ хьакIэхэм къафизыIотыкIырэ зекIо гъогухэм япхырыщын, язэхэщэн ишъыпкъэу пылъхэм ащыщ Къуныпэ Рустам:
— Къуае изыхырэ, лыр зыгъэгъурэ, шыкIэпщынэм еорэ, гъучIыр зыгъэткIурэ — джащ фэдэ лъэныкъохэр къыдыхэтлъытэзэ зекIо гъогухэр зэхэтэгъэуцох. Сыда пIомэ, тичIыопс идэхагъэ имызакъоу, Адыгеим къихьэрэ хьакIэхэм тишъолъыр нэмыкIхэм зэратекIырэр ядгъэшIэным, агу къидгъэнэжьыным ыуж тит. ГъукIэ Замудин изакъоми, ихьакIэщ лъэпкъ культурэм исаугъэт. Адыгэм итарихъ къызхэнагъэр IорыIуатэр ары. Къэбарыжъхэм ижъырэ орэдхэр ягъусэжьэу, мэкъамэр къизыщырэ лъэпкъ музыкальнэ Iэмэ-псымэри гъэфедагъэ зыхъурэм, адыгэ культурэр ухэтми къызэхэпшIэщт. Арышъ, а лъэныкъом хэдгъэхъоным, этнотуризмэм зедгъэушъомбгъуным тыпылъ.
ЗекIо зыгъэпсэфыпIэм ипащэу Тхьайшъэо Рустам къыхегъэхъожьы:
— Чыжьэу къикIыхэрэм тэр-тэрэу тапэгъокIы. Мэфэ пчъагъэм зыдэтщэщт чIыпIэхэр афэтэгъэнафэх. Ахэм зэу ащыщ Адыгэ Республикэм и Лъэпкъ музей, Мыекъопэ бэдзэр гупчэу адыгэ къуаерэ бжьыныф щыгъурэ зыщащэфын алъэкIыщтхэр. ХьакIэу къытфакIохэрэм ар лъэшэу ягуапэ зэрэхъурэм гу лъыттагъ. Адыгэ къуаер изыхырэ бысымгуащэхэм зэзэгъыныгъэ адэтшIыгъэу зекIохэр афэтэщэх. ЗекIо гъогухэр нахь гъэшIэгъоны зэрэтшIыщтым тыдэпажьэ.
Лэгъо-Нэкъэ Iуашъхьэр, Рыфабгъо псыкъечъэхыпIэхэр, Хьаджыкъо къушъхьэ тIуакIэр, Гъозэрыплъэ гъэхъунэхэр, Кавказ къэралъыгъо биосфернэ чIыопс ухъумапIэр — Адыгеим зекIо гъогу зэмылIэужыгъуабэ щыпхырыщыгъ. Осыбэ къызэресырэм емылъытыгъэу дгъэнэфэгъэ зекIо гъогум тырыкIошъугъ ыкIи хэтхыгъэ чIыпIэм тынэсыгъ. Ос алырэгъур къушъхьэхэм къяубгъохыгъэу, тыгъэнэбзыйхэр сыджхэм ащэджэгу. Iажэм исэу зыкъезыгъэцIэнлъэхыхэрэм япчъагъэ бэдэд. Партизан гъэхъунэм зекIо зыгъэпсэфыпIэ пчъагъэ ит. Осыр унашъхьэхэм анэсэу къесыгъ пIоми ухэукъощтэп, шъхьангъупчъэхэм аIуатхъукIыгъэу, «анэ къагъэплъэжьыгъ». Ау щытми, чIыопсыр дэхэ дэд. Адыгэ чIыгум идэхагъэ нэр пIэпехы.
Iоф зышIэрэ зекIо гъэпсэфыпIэхэм зэзэгъыныгъэхэр зэдашIызэ зекIохэр зэфащэжьых. IажэкIэ къушъхьэм къехынэу къэкIуагъэхэр термальнэ псы фабэхэм ахэхьанхэу, псыкъечъэхыпIэхэм анэсынхэу, осрыкIо машинэхэмкIэ мэзыр къакIухьашъунэу, нэмыкI гъэпсэфыпIэ шIыкIэхэм ахагъадэх. Ащ дыкIыгъужьэу адыгэ чIыгум итарихъ, икультурэ, ичIыопс саугъэтхэр къизыIотыкIырэ зекIо гъогухэр щыпхырызыщыхэрэм тишъолъыр къихьэрэ гъэпсэфакIохэм япчъагъэ хагъахъо. Аужырэ илъэсхэм зекIоным Адыгеим нахь зызэрэщиушъомбгъурэм ар изы шыхьат.
Еутых Азэмат — зекIо гъэпсэфыпIэу Партизан гъэхъунэм итхэм ащыщ ибысым. Ащ ихьакIэщ тыригъэблэгъагъ:
— Илъэс 19 хъугъэ зекIоным сызхэтыр. А уахътэм къыкIоцI туризмэм тишъолъыр хэхъоныгъэ инхэр щыфэхъугъэх. ЗесэгъэжьакIэм IэпыIэгъу зи тиIагъэп. Лэгъо-Нэкъэ лъэныкъом Iоф щысшIэщтыгъ. Нэужым Партизан гъэхъунэм сыкъекIужьыгъ. ТичIыопс тыдэкIэ зыбгъэзагъэми дахэ, ау мы чIыпIэр нахь сшIодэгъу. Лэгъо-Накъэ екIурэм нахьи мыщ къекIуалIэрэр нахь макI, арэу щытми, тихьакIэщ цIыф чIэмыфэжьэу бэрэ къыхэкIы. Зедгъэушъомбгъун тигухэлъ. КIымафэм къушъхьэ гъогухэр зэрацIэнтхъурэм ишIогъэшхо къэкIуагъ. Электроэнергиер зекIо гъэпсэфыпIэхэм къаращэлIэнэу тежэ.
Iоф зыдэшIэгъэн фэе лъэныкъуабэхэр джыри щыIэх. Къэралыгъо, шъолъыр программэхэм адиштэу хэхъоныгъэхэр зышIырэ зекIоным Адыгеир нэмыкI шъолъырхэм афызэIуихыщт.
Тэу Замир.
АР-м изаслуженнэ журналист.
Источник: Газета Адыгэ Макъ