Уахътэм къыгъэуцурэ пшъэрылъхэм язэшIохын Уахътэм къыгъэуцурэ пшъэрылъхэм язэшIохын
Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Муратрэ Iахьзэхэлъ хъызмэтшIапIэу «Агрокомплекс» зыфиIоу Н. И. Ткачевым ыцIэкIэ щытым игенеральнэ пащэу Евгений Хворостинымрэ зэдыряIэгъэ зэIукIэгъум анахьэу анаIэ зыщытырагъэтыгъэ Iофыгъохэм ащыщых тыкъэзыуцухьэрэ дунаим икъэухъумэнрэ бизнесымкIэ социальнэ пшъэдэкIыжь хьыгъэнымрэ.
Евгений Хворостиным къызэриIотагъэмкIэ, компаниеу «Агрокомплекс» зыфиIорэм 2016-рэ илъэсым республикэм и Теуцожь район ит къо IыгъыпIэу «Киево-Жураки» зыфиIорэр къыщэфыгъагъ. Илъэсым ыкIэм нэс а комплексыр зыIэ илъ хъугъэм мылъку-зэхэщэн Iофыгъохэр ары зэшIуихыщтыгъэхэр. Джы ащ илъэсым къыкIоцI къо мини 120-рэ фэдиз ыхъузэ ышIыщт.
Адыгеим и ЛIышъхьэ ипшъэрылъхэр пIэлъэ гъэнэфагъэкIэ зыгъэцакIэрэм къызэрэкIигъэтхъыгъэмкIэ, республикэм ипащэхэр инвесторым щэгугъых цIыф псэупIэхэу ащ къыпэблагъэхэм ягумэкIыгъохэм ыкIи яфэныкъоныгъэхэм ынаIэ атыригъэтынэу. Пстэуми апэу ар тыкъэзыуцухьэрэ дунаим, ащ изытет зыфэдэм япхыгъэ Iофыгъохэр зэшIохыгъэнхэр ары. Евгений Хворостиным къызэриIуагъэмкIэ, Роспотребнадзорымрэ Россельхознадзорымрэ игъо къыфалъэгъугъэхэр нахьыбэмкIэ ыгъэцэкIэгъахэх. Ащ нэмыкIэу ебз IыгъыпIэхэм язэтегъэпсыхьанкIэ IофшIэныр предприятием ыублэгъах. Мы илъэсым шышъхьэIум ехъулIэу мэIаеу а лъэныкъомкIэ къикIырэм иIофыгъо зэшIуахынэу мэгугъэх.
«ЭкологиемкIэ Iофхэм язытет тэрэзыным, производствэм икультурэ джыри нахь зыкъегъэIэтыгъэным япхыгъэ IофшIэным мэхьанэшхо иIэу щыт. Тэ тшIэрэр зэкIэ цIыфхэм апай ыкIи ящыIакIэ нахьышIу зэрэхъущтым ренэу тынаIэ тедгъэтын фае. Республикэм ипащэхэм фирмэу «Агрокомплекс» зыфиIорэм лъэшэу лъытэныгъэ ин фашIы, сыда пIомэ Урысыем и Къыблэ ит хъызмэтшIапIэхэмкIэ щысэтехыпIэу ащ зыкъыгъэлъэгъуагъ, социальнэ пшъэдэкIыжь ин зэрихьырэр дэгъоу зэхешIыкIы. Къохэм яхъункIэ IофшIэныр дэгъоу Адыгеим зэрэщызэхэшъущэщтым, цIыфхэм яеплъыкIэ, ягумэкIхэр къызэрэдэшъулъытэщтхэм сицыхьэ телъ», — къыIуагъ КъумпIыл Мурат.
«Промышленнэ шIыкIэм тетэу къохэм яхъун бэкIэ ыпэ ишъыгъ унэе шIыкIэм тетэу ахэр хъугъэнхэм. Ар къыдгурыIозэ, предприятием ичIыгухэм ащыщэу жъокIупIэ гектар 50 фэдиз къыхэдгъэкIынэу пшъэрылъ зыфэтшIыжьыгъ. Ахэм уц къащыдгъэкIыщт, былымхъуным ихэхъоныгъэкIэ къызфагъэфедэн алъэкIыщт хъупIэхэуи тшIыщтых. Джащ фэдэу муниципалитетхэм япащэхэм гущыIэгъу тафэхъунэу тыфай, мы илъэсым еджапIэхэм, кIэлэцIыкIу IыгъыпIэхэм тишIуагъэу ядгъэкIын тлъэкIыщтымкIэ тызэхэгущыIэжьыщт, а IофшIакIэр тапэкIи лъыдгъэкIотэщт», — къыгъэгугъагъ Евгений Хворостиным.
КъумпIыл Мурат Адыгэ Республикэм мэкъу-мэщымкIэ иминистрэ пшъэрылъ фишIыгъ цIыф псэупIэхэу къохъупIэм къыпэблагъэхэм яунэе IэпыIэгъу хъызмэтшIапIэхэм джыри нахь заушъомбгъунымкIэ ишIуагъэ аригъэкIынэу.
Мы зэIукIэм хэлэжьагъэхэр джыри Iофыгъо заулэмэ анэсыгъэх. Гъэпсэфыгъо мафэхэм цIыфхэмкIэ мылъапIэу ермэлыкъхэм къолыр зэращащэщтыгъэм къытырагъэзэжьынэу былымахъохэм игъо афалъэгъугъ.
Республикэм ипащэхэм былымэхъо комплексым тапэкIи IэпыIэгъу фэхъунхэм зэрэфэхьазырхэр къаIуагъ.
Мыщ дэжьым хэдгъэунэфыкIыщт компаниеу «Агрокомплексыр» УрысыемкIэ анахьыбэу къолыр къэзыхьыжьыри 10-мэ зэрахэфагъэр. Предприятием ихъызмэтшIапIэхэм, 2016-рэ илъэсым икIэуххэм нафэ къызэрашIыгъэмкIэ, къо мин 850-рэ фэдиз ащаIыгъ, илъэсым сомэ миллиард 80 фэдиз ахэм агъэзекIо. Фирмэм гухэлъэу иIэр къо пчъагъэр миллионым нигъэсыныр ары. Комплексэу «Киево-Жураки» ыIэ къызэрэригъэхьагъэр а гухэлъым игъэцэкIэн изы лъэныкъохэм ащыщ.
Адыгэ Республикэм и ЛIышъхьэ ипресс-къулыкъу
Сурэтхэр А. Гусевым тырихыгъэх.
Источник: Газета Адыгэ Макъ