Зисэнэхьат хэшIыкIышхо фызиIэхэр Зисэнэхьат хэшIыкIышхо фызиIэхэр
Урысыем хэхъоныгъэ ышIынымкIэ, ар лъэшэу ыпэкIэ лъыкIотэнымкIэ мэхьанэшхо иI ныбжьыкIэхэм ясэнэхьат хэшIыкI фыряIэу, ащкIэ шIэныгъэ дэгъухэр аIэкIэлъхэу, гурыт сэнэхьат зыщызэрагъэгъотырэ еджапIэхэм къачIэкIынхэм. НыбжьыкIэхэр кIочIэшхоу зэрэщытхэр, ахэм хэгъэгур къазэрэщыгугъырэр Урысыем и Президентэу В. Путиным мызэу, мытIоу ныбжьыкIэ форумхэм къащиIоу къыхэкIыгъ.
Гурыт сэнэхьат къэзытыхэрэ еджапIэхэм я Дунэе организациеу Worldskills Russia зыфиIорэм ащкIэ ишIуагъэ къэкIо. АР-м гурыт сэнэхьат къэзытыхэрэ иеджапIэхэм ащыщхэр а организацием ипроектхэм ахэлажьэх. А организациер ары кIэщакIо фэхъугъэр я IV-рэ ЧIыпIэ чемпионатэу «Молодые профессионалы» зыфиIоу тыгъуасэ Мыекъуапэ къыщызэIуахыгъэм.
Щылэ мазэм и 18-м къыщегъэжьагъэу и 25-м нэс ар Адыгеим щыкIощт. Ащ ныбжьыкIи 180-рэ хэлажьэ. Аныбжь елъытыгъэу гощыгъэхэу ахэр мэфи 6-м къыкIоцI зэнэкъокъущтых. Апэрэ купым илъэс 16-м къыщегъэжьагъэу 24-м нэс, ятIонэрэ купым илъэс 16-м ыкIи ащ нахь макIэ зыныбжьхэр, ящэнэрэ купым илъэс 50-м къыщегъэжьагъэу ащ нахьыжъхэри ахэтыщтых. НыбжьыкIэхэм ясэнэхьат хэшIыкIэу фыряIэмкIэ зэнэкъокъущтых.
Зэнэкъокъум егъэжьапIэ фэзышIыгъэ зэхахьэр къызэIуихыгъ АР-м гъэсэныгъэмрэ шIэныгъэмрэкIэ иминистрэ игуадзэу Пэрэныкъо Сусаннэ ыкIи министрэм ыцIэкIи ежь ышъхьэкIи ныбжьыкIэхэм шIуфэс къарихыгъ.
— Мы Iофтхьабзэм мэхьанэшхо зэриIэм ишыхьат сэнэхьатэу зэрызэнэкъокъухэрэм япчъагъэ илъэс къэс зэрэхахъорэр. Ащ фэдэу икIыгъэ илъэсым сэнэхьати 6-кIэ зэнэкъокъугъэхэмэ, мыгъэ 16-мкIэ яIэпэIэсэныгъэ къагъэлъэгъощт. Дэгъоу гъэхьазырыгъэ эксперт 240-рэ ныбжьыкIэхэм алъыплъэщт, уасэ афашIыщт.
Адыгеир Worldskills Russia зыфиIорэм зыхэхьагъэр 2016-рэ илъэсыр ары, ау ащ шIуагъэу къытырэр гурыт профессиональнэ еджапIэхэм зэхашIагъэ, — къыIуагъ Пэрэныкъо Сусаннэ.
Турнирым Адыгеим игурыт еджэпIи 9 хэлажьэ. Ахэр Мыекъопэ политехническэ техникумыр, Красногвардейскэ аграрнэ промышленнэ техникумыр, Мыекъопэ индустриальнэ техникумыр, Дондуковскэ мэкъумэщ техникумыр, Адыгэ кIэлэегъэджэ колледжыр, Мыекъопэ технологическэ университетым и Политехническэ колледж, Мыекъопэ гурыт еджапIэу N 7-р ыкIи Мыекъопэ гуманитарнэ-техническэ колледжыр арых.
IофшIэпIэ площадки 9-мэ АР-м анахь ищыкIагъэхэ сэнэхьатхэм хэшIыкIэу афыряIэр ныбжьыкIэхэм къащагъэлъэгъощт, ахэм эксперт 240-рэ алъыплъэщт.
Сихъу Гощнагъу.
Источник: Газета Адыгэ Макъ