Сабыибэ зиIэ унагъохэмкIэ IэпыIэгъушIу Сабыибэ зиIэ унагъохэмкIэ IэпыIэгъушIу
УФ-м и Президентэу Владимир Путиным УФ-м и Федеральнэ ЗэIукIэ фигъэхьыгъэ Джэпсалъэм къыщиIуагъ сабыибэ зэрысхэ унагъохэм хэбзэIахьхэу арагъэтыхэрэр нахь макIэ афашIынхэу. Къэралыгъом ипащэ къыхьыгъэ предложением гупшысэу хэлъыр къэшIэгъуаеп, унагъом нахь сабыибэ ис къэси, хэбзэIахьэу атыщтыр нахь мэкIэщт.
Сабыищ е нахьыбэ зиIэ ны-тыхэр мы Iофыгъом сыдэущтэу еплъыхэра?
ГущыIэм пае, сабыиплI зиIэ Вера Корпусевам къызэриIуагъэмкIэ, адрэ сабыибэ зиIэ ныхэм афэдэу ежьыри мы къэбарым щыгушIукIыгъ. Шъыпкъэ, мы законыр щыIэ хъумэ хэбзэIахьэу атыщтыр нахь макIэ хъущт. Унагъохэу, сабыи 3 — 4 е нахьыбэ зэрысхэр бгъэшхэнхэ, пфэпэнхэ зыхъукIэ чапыч пэпчъ мэхьанэ иI. Анахьэу ар зыщыкъиныр кIэлэцIыкIухэр еджапIэм чIэбгъэхьажьынхэ е кIымэфэ щыгъынхэр афэпщэфынхэ зыхъукIэ ары. А уахътэр ары етIани хэбзэIахьыр зыщыптынэу зытефэрэр.
Сабыибэ зиIэ Маринэ яплIэнэрэ сабый къыфэхъунэу ежэ. Нахьыжъхэм илъэси 9, 7 ыкIи 5 аныбжьых.
— УФ-м и Президент къышIыгъэ псалъэм осэшIу фэсшIыгъ ыкIи сигъэгушIуагъ, — еIо Маринэ. — Сабыибэ зиIэ унагъохэм атефэхэрэ фэгъэкIотэнхэр ыкIи ахъщэ тедзэхэр зэкIэ къытатых: коммунальнэ фэIо-фашIэхэм, кIэлэцIыкIу IыгъыпIыпкIэм ыкIи еджапIэм зэращагъашхэхэрэм апае кIэлэцIыкIу пэпчъ телъытагъэу сомэ 350-рэ къытфырагъэгъэзэжьы.
АР-м IофшIэнымкIэ ыкIи социальнэ хэхъоныгъэмкIэ и Министерствэ къызэрэщытаIуагъэмкIэ, 2018-рэ илъэсым сабыибэ зэрыс унэгъо 1255-мэ чIыгу Iахьхэр аратыгъэх. ЗэкIэмкIи ащ фэдэ IэпыIэгъу зытефагъэу республикэм исыр 3362-рэ мэхъу. 2019-рэ илъэсым мэзаем и 1-м ехъулIэу сабыибэ зиIэ нэбгырэ 6770-рэ Адыгеим щатхыгъ. Къэралыгъом къафишIырэ фэгъэкIотэнхэр мыхэмкIэ IэпыIэгъушIоу щыт.
КIАРЭ Фатим.
Источник: Газета Адыгэ Макъ