Чъыгэе шъэджашъэм ыкIуачI Чъыгэе шъэджашъэм ыкIуачI
Урысыем иусэкIошхоу А. Пушкиным зиобраз къытыгъэ чъыгэешхоу Лукоморьем щыIэм фэдэ тигъашIэ джыри хэплъэгъон плъэкIыщт. Ежь тхэкIо цIэрыIор бэрэ Кавказым къэкIуагъэми, Шъачэ къынэсыгъэп, ау ШэхэкIэй пэмычыжьэу щыт чъыг иныжъыр ылъэгъугъэм фэдэу къытхыхьагъ.
— АнахьышIур чIыпIэ краеведэу Хъущт Мэдинэ къытебгъэнэшъумэ ары. Къушъхьэ гъогу кIыхьэр ащ ыгъэкIэкIын ылъэкIыщт, ау чIыпIэ гъэшIэгъонэу плъэгъущтхэм къащыкIэщтэп, къыпфиIотэщтыри бэ.
ЧIыгу Iэгъо-благъохэр Мэдинэ дэгъоу ешIэх. Джащ фэдэу хы ШIуцIэ Iушъом ижъырэ тарихъэу пылъыр, Кавказым къыщыкIыхэрэмрэ псэушъхьэу исхэмрэ къарыкIуагъэм зэпимыгъэоу сыхьат пчъагъэрэ къатегущыIэн ылъэкIыщт. Псыхъожъыехэм, къушъхьэ тIуакIэхэм, бжъапэхэм зэкIэми дэгъоу ащыгъуаз. Ащ фэдэ шIэныгъэхэр Мэдинэ тхылъ-хэм къадихыгъэп, тын лъапIэу ахэр ятэжъ пIашъэхэм, ятэжъ, ятэ къыфыщанэжьыгъэх, джы ежь ыкъо ахэр лъегъэIэсыжьых. Мэдинэ зыфеджагъэр мэз Iофыр ары, краеведением илъэс заулэ хъугъэу ишъыпкъэу зыритыгъ.
Ащ къеIуатэ:— Чъыгэе шъэджашъэм ау сыдми уекIолIэнэу щытэп. Ащ ыдэжь ежьэрэ пстэури нэсышъурэп. ШэхэкIэй къыщегъэжьагъэу апэрэ километрэ 12-р, къушъхьэхэм уахэхьэфэ, машинэкIэ пкIущт, етIанэ лъэсэу гъогум пыбдзэжьыщт. Сыхьатрэ ныкъорэ фэдизрэ етIани укIощт, гъогум ызыныкъом нахьыбэм къушъхьэ чэпэ зандэхэм уадэкIоещт. Гъогур къинми, зэ нахь а чъыг хьалэмэтыр умылъэгъущтми, а къиныгъор зэпыпчынэу тефэ. Ау уизакъоу уемыжьэмэ нахьышIу, гъогур зэрэщынагъор ар дэгъоу зэзыгъэшIагъэхэм къаIо.
Хы Iушъом Iус шапсыгъэ лъэпкъым пасэм къыщегъэжьагъэу чъыгым уасэ фешIы. Чъыгэе чъыгышхор ахэм шыихъэу залъытэрэр бэшIагъэ. «ТхьачIэгъкIэ» еджэх, фэсакъых, зэралъэкIэу къаухъумэ. ШапсыгъэхэмкIэ мы чIыпIэр тхьэлъэIупIэ къодыеу щымытэу, кIочIэшхо чIыгум къызщыхэкIырэ чIыпIэу, ар ежьхэм гъэнэфагъэу зыхашIэу алъытэ. Мы чъыгым дэжь къакIоу кIэрытырэ пстэури мэрэхьаты, псауныгъэр зыгъэпытэрэ кIуачIэ апкъынэ-лынэхэм къахахьэу аIо.
Чъыгыр адырэмэ ялыегъэ шъыпкъэу щыт, — къеIуатэ Мэдинэ. — Шэхапэ дэт тюль-
пан чъыгыр илъэгагъэкIэ метрэ 30-м нэсымэ ыкIи идиа-метрэ метри 3-м ехъумэ, мыдрэм ыныбжь ащ къыгъэшIагъэм фэдитIу мэхъу. Ар зыфэдизыр Шъэчэ Лъэпкъ паркым испециалистхэу Михаил Кудинымрэ Константин Глазовым-рэ бэмышIэу ушэтынхэр зырашIылIэхэм къагъэнэфагъ.
— Пщы-чъыгым илъэс 500 — 600 фэдиз ыгъэшIагъэу ары зэрэтлъытагъэр, — къыIуагъ М. Кудиным. — Ар агъэлъэпIэрэ лъытэныгъэ зыфашIырэ чъыгхэм ахэплъытэнэу тефэ. Гурыт лIэшIэгъухэм къащегъэжьагъэу ащ шъхьащэ фашIыщтыгъ, къыпэблэгъэ псэупIэхэм адэсхэм чъыгышхом дэжь лъэпкъ хасэхэр щырагъэкIокIыщтыгъэх.
Шъачэ и Лъэпкъ парк исайт къызэритырэмкIэ, мы лъэхъаным чъыгым изытет дэгъоп. Специалистхэм ащ ыкIоцIкIэ хэшъукIыгъэ чIыпIэхэр къыхагъэщыгъэх, къутэмэ инхэм апакIэхэр пыгъукIынхэу рагъэжьагъ. Чъыг лъэпсэ гъумым къыфэхъугъэ гъонэшхоми чъыгаемкIэ ишIуагъэ къакIорэп. Икууагъэ елъытыгъэу зэралъытэрэмкIэ, ар зэгорэм тыгъужъыбэу щытыгъэн фае.
— КъыхэIагъэми, чъыгыр псау, фэбэ лъэхъанхэм тхьэпэ шхъонтIабзэхэм къахэмыщыжьэу чIаухъумэ, — къыIотагъ М. Кудиным. — Иинагъэрэ къыгъэшIагъэмрэ ялъытыгъэу ащ тарихъ-культурнэ мэхьанэ къылэжьыгъ, арышъ, «ЧIыопсым исаугъэт» зыфиIорэ статусыр фэбгъэшъошэнэу щыт. Ащ фэдэ цIэ лъапIэ къызэратыгъэр зынахь ин Урысыем имыт тюльпан чъыгэу Шэхапэ дэтыр ары Николай Марковым къыхигъэхъожьыгъ:
— Хы Iушъом щыпсэурэ адыгэхэм чъыгхэмрэ мэзжъыехэмрэ ижъыкIэ къыщегъэжьагъэу агъэлъапIэхэзэ къахьыгъ. Мы къэбарыр тхыгъэжъхэми къахэфэ. Диныр зылэжьыхэрэм язекIокIэ-зэхэтыкIэхэр я 19-рэ лIэшIэгъум ыгузэгухэм анэс цIыфхэм къахафэщтыгъэх.
Джащ фэдэхэу чъыг бэгъашIэхэу чIыопсым исаугъэт хъугъэхэу Шъачэ къызэлъиубытырэ шъолъырым заулэ ит. Щысэу къэпхьын плъэкIыщт псэупIэу Къэлэжъым дэт чъыгэе шъэджашъэу IэплIэкIуи 4,5-рэ хъурэр. Чъыгым иинагъэрэ ар зытет чIыгу Iэтыгъэмрэ къыуагъашIэ ар цIыфкIопIэ-тхьалъэIупIэу тапэкIэ зэрэщытыгъэр.
Ащ фэшъхьафэу джыри зы чъыг-хьалэмэт къэбар гъэшIэгъон пылъэу Нэджыго къыщыбгъотыщт. НэмыкI чIыпIэхэми ащ фэдэхэр ащыIэх. Специалистхэм яцыхьэ телъэу къаIо ныбжьыкIэхэм экологиер къаухъумэнэу зэрараIорэм фэдэу чъыгыжъ-иныжъхэм якъызэтегъэнэн дэлажьэхэмэ, хы ШIуцIэ Iушъом ичIыопс бай къызэрэзэтырагъанэрэр.
Ныбэ Анзор.
Источник: Газета Адыгэ Макъ