Цифрэ шIыкIэ къэтыным шъуфэхьазыра? Цифрэ шIыкIэ къэтыным шъуфэхьазыра?

2019-рэ илъэсым ищылэ мазэ къыщегъэжьагъэу телекъэтынхэр цифрэ шIыкIэм зэрэтехьэхэрэм икъэбар цIыфхэм ашIэ­­ми, ащ пылъ Iофы­гъохэм язэшIохынкIэ упчIабэ къэуцу. Джыри нахь игъэкIотыгъэу ащ тыкъытегущыIэщт.

Федеральнэ программэу «Раз­витие телерадиовещания в Российской Федерации на 2009 — 2018 годы» зыфиIорэм къыдыхэлъытагъэу цифрэ къэтыным икъэралыгъо сеть Адыге­им щагъэпсыгъ. Ащ ишIуа­гъэкIэ республикэм щыпсэурэм ипроцент 90-р мультиплекситIуми яплъынхэ амал щыI. Ащ пае приставкэхэр къызIэкIа­гъэхьанхэ фае.

Сыда цифрэ шIыкIэ телекъэтыным шIуагъэу пылъыр?

Цифрэ къэтын шIыкIэм телевидениер зэрэтехьэрэм шIо­гъабэ пылъ: макъэри сурэтхэри зэхэугуфыкIыгъэу къыгъэлъэ­гъощтых, пэрыохъухэр иIэщтхэп, каналыбэ къыубытыщт, чIыпIэ телевидением шъуеплъын амал шъуиIэщт, канал 20-м ыпкIэ шъутыщтэп, ахэр къэзыубытырэ пкъыгъом игъэпсэо-лъэн Iэрыфэгъу. Ащ дакIоу, цифрэ шIыкIэм зытехьэхэм передатчикхэм япчъагъэ бэкIэ нахь макIэ зэрэхъугъэм къы­хэкIэу, электроэнергиеу жъу­гъэкIодыщтыгъэм къыщыкIэщт.

Цифрэ ТВ-м джыри зы шIуа­гъэ пылъ — автомобилым, къэ­лэ транспортым, вертолетым, мэшIокум уарысми, канал 20-р къыубытыщт. ЫпэкIэ ащ фэдэ амал щыIагъэп

ТВ-приставкэм икъыхэхынкIэ сыда анахьэу шъунаIэ зытешъудзэщтыр?

Шъузэрэщыдгъэгъозэгъагъэу, къихьащт илъэсым ищылэ мазэ къыщегъэжьагъэу телевизор къызэрыкIохэм каналхэр къагъэлъэгъожьыщтэп. Цифрэ къэ­тыныр телевизорым къыубы­тыным пае приставкэ гъэнэфагъэ пыбгъэнэнэу щыт. А приставкэм DVB-T2 шапхъэр, видеокодекэу MPEG-4-р ыкIи Multiple-PLP зыфиIорэр хэтынхэ фае.

Приставкэ лъэпкъ зэфэ­шъхьафэу 370-рэ щыI. Гуры­тымкIэ ащ ыуасэр сомэ 1000. Уасэр нахь лъапIэ къэс нахь дэгъоу къыгъэлъэгъоным иамал­хэри нахьыбэу хэтых.

— телевизорым зэрэпы­пшIэщт кабелыр игъусэмэ;
— флешкэр зыпашIэрэ USB чIыпIэр хэтмэ;
— пультыр зыкIодыкIэ, каналхэр зэрэлъыбгъэкIо-
тэщт кнопкэхэр иIэхэмэ;
— приставкэр зыдэлъ тхы­лъыпIэ къэмланым къыдэзыгъэкIыгъэм исайт, техниче-
скэ IэпыIэгъум ителефонхэр ыкIи сервиснэ гупчэм иадрес тетхагъэхэмэ;
— къэмланым хьампIырэшъо тамыгъэ тешIыхьагъэмэ (ащ къегъэлъагъо пкъыгъом имодель РТРС-м сертификат зэрэпилъхьагъэр).

Сыд фэдэ антенна къыхэшъухыщтыр?

Цифрэ къэтын шIыкIэр телевизорым къыубытыным фэшI дециметровэ е зэкIэ сыджхэр (волнахэр) къэзыубытырэ антеннэ ищыкIагъ. Ащ икъы­хэ­хынкIэ анахьэу шъунаIэ зыте­шъудзэн фаер: шъуиунэ телебашнем зэрэпэчыжьэр, къэ­тынхэр къэзыубытырэ пкъыгъом кIуачIэу иIэр, чIыпIэу е къатэу шъузыщыпсэурэм илъэгагъ, къышъукIэрыт предприятиехэм пэрыохъоу къатыхэрэр, нэмыкIхэри.

Къоджэ псэупIэхэу телебашнем пэмычыжьэхэм е метри 10 нахь зимылъэгэгъэ псэо­лъэшIыгъэхэм апае унэм ит антеннэ мыинри хъущт.

Къушъхьэ, бгышъхьэ чIыпIэ­хэу мэзхэр зигъунэгъу псэупIэ­хэм сыджхэр зэкIэ къэзыу­бытыхэрэ антеннэ ин (9 — 14 дБ) ящыкIагъ.

Къалэхэм, къатыбэу зэтет унэхэм ащыпсэухэрэм на­хьыбэрэмкIэ антеннэхэр уна­шъхьэхэм атырагъэуцох е купэу зэхахьэхэшъ, зы антеннэ ин къызэдащэфы.

Къэтын шIыкIитIур а зы телевизорым къызэребгъэубы­тыщтыр

Федеральнэ телеканалхэм ягъусэу чIыпIэ къэтынхэм цIыфыр яплъы шIоигъомэ цифрэ ыкIи аналог къэтын шIыкIитIур а зы телевизорым къыубытынхэу щыт. Ащ пае сыджхэр зэкIэ къэзыубытыщт антеннэ ищы­кIагъ.

Антеннэм къикIырэ кабелыр приставкэм зыпыпшIахэкIэ (RF OUT чIыпIэр) телевизорым ипышIапIэу (ANT IN-м дэжь) приставкэм къикIырэр еощэлIэжьы. Нэужым пультым TV шапхъэр къеубытыфэ улъы­хъущт. Канал зэфэшъхьафхэм алъыбгъэкIотэным фэшI цифрэ къэтыныр къэзыубытырэ приставкэм ипульт огъэфедэ.

ШъошIа, шъущыгъуаза?

Телевидение цифрэ къэтын шIыкIэр къэзыубытырэ пкъыгъор электроникэ ыкIи унагъом щагъэфедэрэ техникэр зыщащэхэрэ тучанхэм къащышъущэфын шъулъэкIыщт.

Мы уахътэм къыдагъэкIырэ телевизор лъэпкъ зэфэшъхьаф 2000 фэдизмэ DVB-T2 шапхъэр ахэт. Ащ къикIырэр приставкэр шъхьафэу къэпщэфын ищыкIагъэп, телевизорыкIэу джы къашIыхэрэр цифрэ къэтын шIы­кIэр къаубытыным фыте­гъэпсыхьагъэх. Анахь осэ макIэу а телевизорхэм яIэр сомэ 5450-рэ.

Шъугу къэдгъэкIыжьын, цифрэ къэтын шIыкIэр къэзы­убытырэ пкъыгъоу DVB-T2-р зэфэшъхьаф лъэпкъ 300 фэдиз мэхъу. Ахэм ауасэ сомэ 515-м къыщырегъажьэшъ, сомэ 1000-м ехъу.

Дециметровэ антеннэр — сомэ 300.

Цифрэ шIыкIэр къэзыубы-тыщт приставкэм икъыхэхынкIэ е игъэуцункIэ Iофыгъохэр къызыуцухэкIэ, зэпымыоу Iоф зышIэрэ телефонэу 8-800-220-20-02-м шъутеон шъулъэкIыщт.

Сыд фэдэ каналхэм тяплъын тлъэкIыщта?

МультиплекситIум хэхьэрэ канал 20-м Урысыем щыпсэу­хэрэр ыпкIэ хэмылъэу яплъыщтых.

Апэрэ мультиплексым ха­хьэхэрэр: «Первый канал», «Россия 1», «Матч ТВ», НТВ, «Петербург-5 канал», «Рос-сия-Культура», «Россия 24», «Карусель», «Общественное телевидение России», «ТВ-Центр-Москва» ыкIи радиохэу «Радио России», «Маяк», «Вести ФМ» зыфиIохэрэр. ЯтIонэрэр: «Рен-ТВ», «Спас», «СТС», «Домашний», «ТВ3», «Пятница», «Звезда», «МИР», «ТНТ», «Муз-ТВ» зыфиIохэрэр.

Адыгеир цифрэ къэтыным зэрэфэхьазырыр

Непэрэ мафэм ехъулIэу цифрэ шIыкIэм тетэу телерадио­къэтынхэр къагъэлъэгъонхэм фэшI республикэм станцие 15 щагъэпсыгъ. Ахэм яшIуагъэкIэ республикэм щыпсэухэрэм япроцент 99,95-м нэсэу ар алъыIэсыгъ. Къэнэгъэ закъор Гъозэрыплъэ Iэгъо-блэгъур ары. Охътэ кIэкIым ащ епхыгъэ Iофы­гъори зэшIохыгъэ хъущт.

Социальнэ IэпыIэгъур

2012-рэ илъэсым ыпэкIэ къе­жьэгъэ телевизорхэм ­приставкэ апымытэу къэтынхэр къызэрамыгъэлъэгъожьыщтыр нэжъ-Iужъхэм икъоу алъыдгъэIэсын фае. Гъот макIэ зиIэхэм цифрэ при­ставкэхэм якъэщэфынкIэ къадеIэнхэу Адыгэ Республикэм имуниципальнэ образованиехэм яадминистрациехэм со­циальнэ IэпыIэгъумкIэ яотдел­хэм зафагъэзэн алъэкIыщт. Приставкэхэм язэтегъэуцонкIэ социальнэ IофышIэхэр ыкIи волонтерхэр нэжъ-Iужъхэм IэпыIэгъу афэхъущтых.

Iэшъынэ Сусан.