ЛIэкъо лъапсэр ЛIэкъо лъапсэр
ЦIыф лъэпкъ пэпчъ шэн-хабзэхэр, зекIокIэ-шIыкIэхэр, бзэр иIэх ыкIи ахэр зы лIэужым къыкIэлъыкIорэм IэкIигъахьэхэзэ къырэкIо. Гушъхьэбаиныгъэм ыкIи унагъом икультурэ якъызэтегъэнэнкIэ лIэужхэр зэкIэрыплъыжьынхэм, зэпхыгъэнхэм мэхьанэ иI.
ТапэкIэ, илъэс 40 — 50-кIэ узэкIэIэбэжьмэ, адыгэ унагъохэм арыс нахьыжъхэр ашIоIофэу лIэкъо лъапсэр къакIэхъухьэхэрэм зэрарагъэшIэщтым ыуж итыгъэх. Сабыим епIуи, зэхихи псынкIэу ыгу зэрэриубытэрэр къызфагъэфедэзэ, лIэужиблыр — ятэм ятэр, ятэжъым ятэжъыжьхэр IапэкIэ къафалъытэзэ арагъашIэщтыгъ.
ГущыIэм пае, кIэлэцIыкIум ятэр Щэбан; ащ ятэр — Рэджэб, ящанэрэр — Рэмэзан, ащ ятэр — Хьасан, Хьасанэм ятэр — Наныу, яханэрэр — Умар ыкIи ащ ятэр Мыхьамэт. Мыхэр зэкIэ зы лIым, зы лъапсэм текIыгъэх — Мыхьамэтыкъох. Ахэм къалъфыжьыгъэхэу ябынхэри, ахэм атекIыгъэхэри зы лIэкъо чъыгым щыщых. ЛIакъо пэпчъ итарихъ зы унэгъо хэхыгъэ итарихъ къодыеп, лъэпкъым ыкIи хэгъэгум ятарихъ изы Iахьэу мэхъу. Джары лIэкъо лъапсэм игъэунэфын ыкIи итхын лъэпкъыр къызэтенэнымкIэ уасэу иIэр.
ШIэныгъэ тхыгъакI
ШIэныгъэлэжьэу Нэшъулъэщэ Индирэ итхылъэу «Моя родословная» зыфиIоу Мыекъуапэ къыщытырадзагъэр лIэкъо лъапсэм изэхэфын-гъэунэфын ыкIи унэгъо лIэкъо чъыгыр зэрэзэхэбгъэуцощтым яхьылIагъ. УФ-м гъэсэныгъэмрэ шIэныгъэмрэкIэ и Министерствэ, Адыгэ къэралыгъо университетым ыкIи Темыр КавказымкIэ шъолъыр ономастикэм изэгъэшIэнкIэ Координационнэ гупчэм яшIэ хэлъэу, игъоу зэралъэгъугъэу къыдэкIыгъ.
Тхылъыр гущыIапэм къызэIуехы. Ащ къыкIэлъэкIох: генеалогиер — лIэкъо тарихъыр зэзыгъашIэрэр; ономастикэр — цIэ унаехэм яхьылIэгъэ шIэныгъэр; антропонимикэр — лIэкъо лъапсэр зэрэзэхэбгъэуцощт шIыкIэр. Аужырэ шъхьэм Iофыр къызыщебгъэжьэщти, птхыщти, зызфэбгъэзэщт IофшIапIэхэри IэпыIэгъу бгъотынхэмкIэ ыкIи ежь лIакъо пэпчъ хэт цIыф Iушхэр анахьэу къыздебгъэIэнхэр зэрищыкIагъэр тхылъым къыщыIотагъ. Адыгэ-хэр лъэпкъыжъых, ялIэкъо тарихъи, ежь лъэпкъым итарихъ кууи лъэшэу узыгъэгупшысэх. Ау Урысыер пштэмэ, бэдэдэ шIагъэу лIэкъо чъыгхэр цIыф гъэсагъэхэм зэрэзыфатхыжьыгъэхэр тарихъ тхыгъэжъхэм къаушыхьаты.
И. Нэшъулъащэм итхылъ адыгэхэмкIэ мэхьанэшхо иI, сыда пIомэ уилIэкъо лъапсэ, уиунагъо къарыкIуагъэр, укъызхэкIыгъэхэр зыфэдагъэхэр пшIэныр гъэшIэгъоны ыкIи ори нахь зыкъыуегъэгъоты. «ЛIэужыр бжиблэу мао» зыфаIорэ гу-щыIэжъым къикIырэри джащыгъум хэти нахь къыфэнэфэщт, тыжъ-ныжъхэм яIокIэ-шIыкIэхэр, ягъэпсыкIэ-хабзэхэр, зыдамышIэжьэу, лIэужыкIэхэм къызэрахафэрэм ригъэгупшысэщтых. Тхылъыр ныбжь зэфэшъхьафхэм арытхэм атегъэпсыхьагъ.
ЛIэкъо лъапсэм изэгъэшIэн-зэхэфынкIэ унэшъо гъэнэфагъэхэр къызыщышIыгъэ тхылъыр тлъапсэ тшIэнымкIэ ыкIи гъэунэфыгъэнымкIэ IэпыIэгъу дэгъу. Тхылъым «Гъогу маф!» етэIо, авторым творческэ гъэхъэгъакIэхэмкIэ тыфэлъаIо.
Мамырыкъо Нуриет.
Источник: Газета Адыгэ Макъ