Яхахъохэр зыфэдизхэр зэрагъэшIэщт Яхахъохэр зыфэдизхэр зэрагъэшIэщт
Урысые Федерацием и Правительствэ унашъоу ышIыгъэм диштэу социальнэ-демографическэ гумэкIыгъохэр, шъолъырым щыпсэухэрэ цIыфхэм гурытымкIэ мазэм къаIэкIахьэхэрэ хахъохэр зыфэдизыр, социальнэ программэхэм ахэр зэрахэлажьэхэрэр зэгъэшIэгъэнхэм фытегъэпсыхьэгъэ Iофтхьабзэ Адыгэ Республикэм щызэхащэщт.
2017-рэ илъэсым къыщыублагъэу мыщ фэдэ Iофтхьабзэхэр (опросы населения) Урысые Федерацием исубъектхэм ащызэхащэх. Адыгеим мы илъэсым щызэхащэщтым унэгъо 432-рэ къыхагъэлэжьэнэу агъэнафэ, 216-р – къоджэ псэупIэхэм, ащ фэдиз къабзэ къалэхэм адэсых. Ащ хэхьащтых къалэхэу Мыекъуапэрэ Адыгэкъалэрэ, къуаджэхэу Пэнэжьыкъуае, Блащэпсынэ, Хьатикъуае, Мамхыгъэ, Щынджые, станицэхэу Джаджэмрэ Ханскэмрэ, поселкэхэу Краснооктябрьскэмрэ Победэмрэ ащыпсэухэрэр.
ЦIыфхэм яхахъохэр зыфэдизхэм ыкIи ахэр социальнэ программэхэм зэрахэлажьэхэ-рэм язэгъэшIэн 2019-рэ илъэсым щылэ мазэм и 19-м щегъэжьагъэу мэзаем и 8-м нэс рагъэкIокIыщт. ЫпшъэкIэ зигугъу къэтшIыгъэхэ псэупIэхэм адэсхэм къахахыхэрэм упчIэ гъэнэфагъэхэр афагъэзэщтых. Ащ пае документ ищыкIагъэп, цIыфым джэуапэу къытыжьыгъэхэр статистикэ закъор ары зыщагъэфедэщтыр.
Источник: Газета Адыгэ Макъ