Инвестиционнэ проектышху Инвестиционнэ проектышху
Урысыем икъыблэ хахьэхэрэ шъолъырхэм ащагъэцакIэхэрэ инвестиционнэ проект анахь инхэм ащыщ къэралыгъо корпорациеу «Росатомым» хэхьэрэ компаниеу «НоваВинд» зыфиIорэм жьыбгъэкIэ Iоф зышIэщт паркэу Адыгеим щигъэпсырэр.
Республикэм имызакъоу, УрысыемкIи мыр проектышхоу щыт, шъолъырым иэкономикэ хэхъоныгъэхэр ышIынхэм, ащ иэнергосистемэ зыпкъ итэу Iоф ышIэным фэIорышIэщт.
Проектыр зыщагъэцакIэрэр Шэуджэн ыкIи Джэджэ районхэр арых. ЗэрагъэнэфагъэмкIэ, МВти 150-рэ кIуачIэ зиIэ жьыбгъэкIэ Iоф зышIэщт паркымрэ кВт 220-рэ кIуачIэ зиIэ подстанциемрэ ашIыщтых, непэрэ мафэм ехъулIэу мы лъэныкъомкIэ компанием зэшIуихыгъэр макIэп.
Проектыр зыщагъэцэкIэрэ чIыпIэм жьыбгъэкIэ Iоф зышIэщт пкъыгъо 60 къиуцощт, ахэм ялъэгагъэ метрэ 75-м щегъэжьагъэу 135-м нэсыщт. Илъэсым къыкIоцI гурытымкIэ кВт миллион 354-рэ электроэнергие къатыщт.
Мы проектыр зэрифэшъуашэу гъэцэкIэгъэным Адыгэ Республикэм и ЛIышъхьэу КъумпIыл Мурат мэхьанэшхо реты. Ащ ишыхьатэу «зы шъхьангъупчъэкIэ» заджэхэрэ шIыкIэмкIэ ар лъагъэкIуатэ, инвесторым сыд фэдэрэ лъэныкъокIи IэпыIэгъу фэхъух.
Источник: Газета Адыгэ Макъ