Еленэ дахэм узыIэпещэ Еленэ дахэм узыIэпещэ
Адыгэ Республикэм и Камернэ музыкальнэ театрэу Хьанэхъу Адамэ ыцIэкIэ щытым Еленэ дэхэ дэдэм фэгъэхьыгъэ къэгъэлъэгъонэу щыкIуагъэм искусствэр зышIогъэшIэгъонхэр ягуапэу еплъыгъэх.
Оркестрэм ихудожественнэ пащэу, Адыгэ Республикэм изаслуженнэ артистэу Аркадий Хуснияровыр яIэшъхьэтетэу музыкантхэм орэдышъор агъэжъынчыгъ. Адыгеим изаслуженнэ артисткэу Елена Лепиховам опереттэм роль шъхьаIэр къыщишIыгъ. Артистхэу Виктор Марковыр, Ирина Кириченкэр, Михаил Кобановыр, Александр Степановыр, Александр Федоровыр, ЛIыин Бэлэ, Владислав Верещако, Надежда Максимовар, Галина Лодяновар, фэшъхьафхэри къэгъэлъэгъоным хэлажьэх.
ШIулъэгъур Iахь мыгощ. Дин IофышIэхэр, пачъыхьэхэр, полицием икъулыкъушIэхэр, чэмахъохэр, тхьэкIэкIо-лъэкIакIохэр шIулъэгъум зэлъештэх. Угу рихьыгъэм сыдэущтэу зыкъебгъэшIэщта? Сыда апэу епIомэ нахьышIур? Пачъыхьэм ыкъо пшъэшъэ дахэм лъэкIо, ау гукIи, псэкIи зыкъыригъэлъэгъун ылъэкIырэп. Чэмахъом е мэлахъом ыбзэ нахь къызэрыкIоу егъэпсы. Ащ ишIуагъэкIэ IэнэтIэшхо зыIыгъэу шIулъэгъум имашIо ыстырэм цIыф къызэрыкIоу, чэмахъоу зыкъегъэлъагъо. Владислав Верещако ролыр фэIэпэIасэу къешIы. Елена Лепиховар итеплъэкIи дахэ, зэрэфэпагъэм узыфещэ, орэдыр гупшысэшIум репхы.
КъэшъуакIохэм, оркестрэм опереттэр къагъэбаигъ. Псэ зыпыт зэдэгущыIэгъухэр артистхэм IупкIэу къашIых. Музыкальнэ театрэр къэгъэгъэ Iэрамышхом фэдэу зэхахьэм къыщылъэгъуагъ. Художественнэ пащэу, опереттэр зыгъэуцугъэу Сулейманов Юныс тызэрэщигъэгъозагъэу, спектаклэу «Шахъомрэ пшъэшъэ пагэмрэ» мэзаем къагъэлъэгъощт.
Сурэтым итхэр: опереттэм артистхэр хэлажьэх.
Источник: Газета Адыгэ Макъ
